MIDANG – NGUJANG – MEREWEH

Ucapan “Midang” bersala lekan Basa Kawi ( Jawa Kuna), Midang Berma’na : acangkrama – beroja – bekedek ( becengkrama/ind. ) . Midar = ngelining. Menurut bahasa Sasak si tesebut haran midang sino , tau mama si lalo ngayo aning balen bebalu atawa dedara. Sera mula pengayona sino bedue maksud bekemele leq tau nina si teayoinna. Yan tau raos bineq mako, raos téngala, raos utang talang sino nde’na te haranin tau midang. Waktuna sihara midang sino hya kekelem antara jam 08/balu’  jangka  kira-kira jam 11/solas. Araq masi dengan midang kenjelo . Lagu’ sino kurang patut mengkarana’ ngelalahin dengan begawean.

Awig-awig midang :

  1. Si kanggo midang sino selapuq tau mama si endeq muhrimna sinina, dedara atawa bebalu. Yadyan wah bedue senina, bebalu mama, sisugih atawa si jeleng.
  2. Nde’ne kanggo nyugulang rasa penampayan (cemburu) mengkarana masih pada dalem ambaran.
  3. Angkunna pada tokol besila ade’na pada tepah, nda’ na araq si nyeset desek dedara.
  4. Yan araq batur dateng midang , si bejulu ade’na glis bepamit. Hay teruntut aranna. Dakaqna nde’man puas atena ngemos, lagu’ wajib na bepamit bejulu.
  5. Antara pada temue (pemidang) nde’na kanggo saling satu’ ( nyugulang aiq atawa pengunang ). Si nagturang ceret atawa peminang sino mula si dadara. Lamun ara’ teruna si bejulu dateng nyatu’ penginang leq temoe si lain, sino jalaran batur merang ( sili). Mengkarana tau si besatu sino wah nganggep diri’na jari epen bale. Wah ngepeang tau nina sino.
  6. Tau mama si “ teruntut “ serta bepamit hay kanggo ngalih midang le’ balen dedara atawa bebalu di lain.
  7. Midang sino kekelem antara jam 8- balu’ jangka jam 11- solas.
  8. Dengan si dateng midang wajib na tetemin hisi’  dedara/bebalu hepen bale. Semethon yadyan inaq amaq na wajipna singkirang diriq. Sino mawinan dengan si bedoe anak dedare menyakiyit hya mya’ beruga’/ sekepat aning minjah diri’na.
  9. Sesangkoq taoqta midang sino ade’na ngenah ( terbuka). Kecuali araq cara-cara midang le’ tao’ si bekelingkim mengkrana mule potongan bale leq desa sino bekelingkim (betutup).
  10. Nde’na kanggo peda’ dila waya na haraq pemidangan sino. Almunn nde’na sediah lantaran angin deres atau buweq minyak na sino lain soalna.

Catatan  :

Si mula jati guna-an cara midang sino sibagian jajar karang (adat laeq). Dengan Menaq nde’ na kanggo saling pidangin mara’ cara-cara si tesebut le’ atas si baru’. Lagu’ lue’ per-lalu (menaq) sikurang tertip na ngentiq  adat , beterus lalo hya bedurus midang. Pang na tetemin siq dedara. Maliq ara’ menaq midangin para menaq. Sino mula ndeq na tekena-an si’ adat ta siq laeq. Syukur-syukur yanna pada suka ngelakonang cara  MIDANG si tertip sino.

Lagu’ mula hya si aran  cara mangkin “ Masa Kini “ atawa “Moderen”  ende’ na keruan tertip tapsila selapuq na tebabar doang “nde’ kembe-kembe” ongkat-na. Bajangan beberaya cara mangkin mula ginna pada maraq cara tau kapir, berigo’, saling amoq ujel. Bekapong leq atas montor rasa aningna ngelamang, ndeqna peduli kejelo hape kekelem. Nah selapuq sino adeqta saring sekedi’ yan endeq laloq bau si te tegah hya.

Menurut tata care laeq, lamun araq menaq berangen ojoq dedare lekan  kawula, rapetinne dengan toaqna. Jari almunia dateng ndeqna perla tetemin siq dedare maraq angkun pemidang silain. Sewaktu-waktu na doang ngeraos kance si dedare, sine lamun na bejangkep si teparan: Kahambil.

NGUJANG

Ngujang sino ngelai’ dedara le’ taoqna si begawean, misalna le’ bangket, lendang, beterus betulung hay begawean bareng dedare. Nulung hay lowong – mata’-ngembot kedele dain si lain-lain.

Biasana teruna si NGUJANG ngenti’ hya kakenan merua tebu, jeruti, puntiq, kenyamen atawa kakenan si lain.

MEREWEH

Yan dedare ta pasila’ mongkaq cara beredang (ngedang), beterus dateng si mama ngenti’ bakaq berisi sarwa kakenan. Teserah kakenan sino haning dedara leq taoqna si mongkaq sino haran MEREWEH.

Mereweh berasal ongkat weh, artine; beang – sade’ . Pereweh ma’nana perbengan. Yan cara paer tengaq hilaq po berayanta yang sadekna si mongkaq ngedang sino endeqna haraq perewehanna.

Kosok wangsulna ( kebalikanna) dedare si luweq perewehanna sino pastina bungah atena, sino tandena” kebut” lais hya.

Isin pereweh biasana : Puntiq susu atawa puntiq lumut, limun, jaja ruti, salaq manggis, nyambuq, jeruti dait selapuq macem woh-wohan ( pesatu-an).

NYANGKOQ

Nyangkok sino berasal lekan sesangkoq. Tau misang si besengkala  uleq mengkeranaq ujan atawa takut tbegal teranpoq leq langan kanggo hya nindoq le’ balen dedare. Biasana si nyenyangkoq sino teruna si ginna aru mayuang. Lagu’ ara’ masi teruna ”codol” , si kurang ilaqna sigirang nyangkoq leq balen dedara. Mara’ dengan angenang penyampah angkunna.

PEMBUGI

Pembugi berasal lekan Pembagya maknana jari ke-bahagiaan- atawa peseneng si tauqta berangen. Bebugi maknana berebeng ape juaq si nyenengan aten dedare taukta berangen.

Ara’ due macem pembugi sino :

  1. Pembugi si mula jati tesorong isiq kesuka’ aten si mama. Endeqna wah te endengin. Bara-bara hay ngirim sabun, bakal, berebeng ali-ali, kalung atawa duwe banda si lain. Yan barang-barang sino ta kirim lekan subandar hay sino tesebut PIKIRIM, bau masih pikirim sino beruwe kakenan.
  2. Pembugi tedasarin pelakoq si nina ginna jari buktina sitetu berangen, jari langan sebab syarat kesanggupan hay gin merari’. Misalna belakoq hay tebeliang teken, kalong, tebayahang utang, tepia-an bale, tebeliang montor.Pembugi macem si Niké pantesna ta sebut  haran MITUI ( tanda kesetiaan janji).

Yen jema’ suli’na tabilin tau mama sino merariq kanca tau mama lain, selapuq barang sino tetagih maliq leq tau nina ones beyana sino. Tau mama si jari semamaqna wajibna  tulakan selapoq perebengan  sino jari kemeranganna (gengsi), biasane telebihhan hya lekan perebengan si wah teterimaq. Lantaran perebengan sino nde’na lantaran telako’in serta endeqna tapabanda’ isi’ janji.

SUBANDAR

Subandar nike hya tejuluq le’ tau si jari perantara. Almunia cara betawi hay si teparan Maq Comblang. Rua-ruanna jejuluq sino tebait lekan Syahbandar. Mengkrana si Subandar nika jari juru bahasa – perantara pedagang si dateng le’ labuan kance sigen pada meli barangna.

Hara’ lelakaq ngene ongkatna :

Belandar kayu’ kesambiq’

Beli dare le’ pamotan

Subandar kocap maiq

Si beberaya kemomotan.

Satu Tanggapan

  1. salam semeton..
    artikelnya bagus2.
    kunjungi juga web kami ya?

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: